25/04/16

Marga Pazos na entrega dos Premios Mestre Mateo 2016



Na gala dos Premios Mestre Mateo, Marga Pazos facía unha chamada á defensa do noso idioma e da nosa cultura. Invocou os versos do poeta homenaxeado no Día das Letras Galegas deste ano, Manuel María.

          A fala

O idioma é a chave
coa que abrimos o mundo:
o salouco máis feble,
o pesar máis profundo.

O idioma é a vida,
o coitelo da dor,
o murmurio do vento,
a palabra de amor.

O idioma é o tempo,
é a voz dos avós
e ese breve ronsel
que deixaremos nós.

O idioma é un herdo,
patrimonio do pobo,
maxicamente vello,
eternamente novo.

O idioma é a patria,
a esencia máis nosa,
a creación común
meirande e poderosa.

O idioma é a forza
que nos xungue e sostén.
¡Se perdemos a fala
non seremos ninguén!

O idioma é o amor,
o latexo, a verdade,
a fonte da que agroma
a máis forte irmandade.

Renunciar ao idioma
é ser mudo e morrer.
¡Precisamos a lingua
se queremos vencer!                                    
                               Manuel María

Sem comentários:

Enviar um comentário